இருந்ததுமில்லை இல்லாததுமில்லை
இருளுமில்லை எங்கும் வெளியுமில்லை
பொருந்திய காற்றும் போகுமிடமுமின்றி
புவியுமில்லை புகலிடமும் யாதுமின்றே
மரணமுமில்லை மாறா அமுதமுமில்லை
மாலையுமில்லை மலரும் பகலுமில்லை
இரவும் பகலும் எண்ணற்ற காலமாய்
இயங்கா நிலையில் ஏகமாய் நின்றதே
ஆதியில் இருளே அனைத்தையும் மூட
அறிவற்ற நீரில் அனைத்தும் மூழ்கியதே
சோதியற்று சூனியமாய் சுருங்கிய அவ்வுலகம்
சுடரொளி வெப்பத்தால் சுயமாய்த் தோன்றியதே
காமம் முதலாய் கருத்தினில் தோன்றி
கனவாய் உருவாய் கண்ணில் தெரிந்ததே
ஞானிகள் உணர்ந்தார் நடுவில் ஓர் கயிறு
நல்லதும் தீயதும் நாடோறும் பிணைப்பதை
மேலதோ கீழதோ மேதினி எங்கணும்
மேவிய சக்தி மிகுந்து பரவியதே
ஆக்கல் காத்தல் அழித்தல் மூன்றும்
அருவமாய் உருவமாய் அமைந்து நின்றதே
எங்கிருந்து வந்தது இவ்வுலகப் படைப்பு?
எவரால் உண்டானது இயற்கையின் அமைப்பு?
தெய்வங்கள் கூட தெரிந்திலர் இரகசியம்
தெளிவாய் உரைப்பார் தெரிந்தவர் யாருளர்?
உலகின் தோற்றம் உண்மையில் எப்படி?
உயர்ந்தோன் படைத்தானோ உதாசீனமாய் நின்றானோ?
அலகில் வானில் அமர்ந்திருப்பவனே
அறிவான், ஒருவேளை அவனும் அறியானோ?
No comments:
Post a Comment